Il-kanzunetta “Logħob li Jgħaqqadna” hija d-diska uffiċjali tal-Malta School Games, inizjattiva nazzjonali li tgħaqqad eluf ta’ studenti minn skejjel madwar Malta u Għawdex permezz tal-isport u l-valuri tiegħu.
Miktuba minn Augusto Cardinale, b’mużika ta’ Philip Vella u interpretata mill-kantant Malti Glen Vella, din id-diska tirrifletti l-ispirtu ta’ għaqda, ħbiberija u teamwork li jinsab fil-qalba tal-logħob. Il-kliem u l-melodija tagħha jenfasizzaw kif l-isport mhux biss kompetizzjoni, iżda wkoll mezz biex jinbnew relazzjonijiet, karattru u rispett bejn iż-żgħażagħ, filwaqt li jippromwovi stil ta’ ħajja attiva u valuri pożittivi.
Hekk kif qed noqorbu lejn il-bidu ta’ dawn il-logħob, l-eċitament qed jiżdied, bil-ftuħ uffiċjali ppjanat għall-5 ta’ Mejju. F’din l-edizzjoni, madwar 800 student se jipparteċipaw biex jikkompetu għal midalji f’14-il dixxiplina sportiva differenti. Il-kompetizzjonijiet se jsiru fil-kumplessi sportivi ewlenin ta’ Malta, fejn iż-żgħażagħ se jkollhom l-opportunità juru t-talenti tagħhom, jgħixu l-valuri tal-isport u jkomplu jsaħħu l-għaqda li din l-inizjattiva tirrappreżenta.
Inħeġġu lill-istudenti u lill-għalliema tagħhom sabiex iħaddnu din id-diska u juru kull appoġġ lejn it-timijiet tal-iskejjel li qed jipparteċipaw, biex flimkien noħolqu atmosfera ta’ entużjażmu, rispett u għaqda tul dawn il-logħob.
GLEN VELLA – LOGĦOB LI JGĦAQQADNA (MALTA SCHOOL GAMES ANTHEM SONG 2026)
Logħob li jgħaqqadna
L-ewwel pass dejjem diffiċli
Forsi qalbek taqta’ ftit
Bit-taħriġ u l-kelma t-tajba
Kunfidenza, fik iżżid
Għax bl-isports, bħal ħajja tagħna
Ngħixu sfidi ta’ kuljum
Daqqa tħossok todgħos l-isfel
Daqqa b’qilla daqs ta’ ljun
RIT. U mal-għajta tas-suffara
Tibda l-ġirja għas-suċċess
Ejj’ ingħaqad mat-tim tagħna
Lkoll flimkien, aħna l-istess
Ngħollu ‘l fuq dik il-bandiera
U b’din l-arma ‘ħna kburin
Festa kbira tat-tfulija
Ferħanin li tfal Maltin
Ole. oh oh
Ole, oh oh
M’hemmx fruntieri w differenzi
Hawn milqugħ, kulħadd ġenwin
Bejn il-ħbieb, qatt m’inti waħdek
Nieħdu gost b’logħbiet ħelwin
Tħossok b’saħħtek, moħħok jikber
Tfeġġ ir-responsabilta’
Agħmel l-almu kollu tiegħek
Emmen fil-kapaċita’
Rit. U mal-għajta tas-suffara…
U bħal ritratt titnaqqax l-esperjenza
Li tibqa’ sew infakkra tul iż-żmien
U jasal il-mument li tħares lura
Tkun tista’ tgħid, li fir-ritratt hemm jien
Rit. U mal-għajta tas-suffara…x2
